تروسيه وتصميم جديد …~

..}{..

صارلي فتره ماطقطقت على الفوتو والتصاميم

تقريباً اسبوعين أو أكثر من بعد المخطوطه إلي سويتها

فتحت الفوتو اليوم لتصميم طُلب مني وأنا أصلح فيه خطرت فكرة تصميم التروسيه للمدونة ..وبديت فيه

وخلصته

والتصميم المطلوب مني وقفت ولا سويته … نرجعله بعدين

رايكم بالتروسيه الجديد …!

مغامرتي مع جهازي والكيبورد ..~

السلام عليكم ورحمة الله

انتهت الإختبارات وبدت الأفكار والخطط الجهنمية تطلع

جهازي له فتره مانظفته , كذا طرا على بالي أقوم بتنظيفه وأفكك أزاريه

نزلت بجهازي تحت عند الوالده وبديت العمل … جبت العده حقتي مع إنه كنت حاطه في بالي

أشتري أدوات تنظيف الأجهزة من جرير بس نسيتهم

وماصبرت انتظر حتى أروح أجيبهم وخصوصأً بخاخ الهواء …

سميت بالله وشلت أول زرار وثاني زرار ورجعت تركيبهم ضبطوا ومافي خلل ..:)

لما شفت إنه الأزارير تتفكك معاي ولا في أي مشكله قشعت البقية كلها

جهازي السابق كم مره شلت أزاريره أما هذا خايفه لانه توه .. بس تشجعت بعد حلقة حياة تك << ياويلي منهم هع

وصفيتهم على جنب على شكل الكيبورد وصورتهم حتى لو احتاسن بعدين

أو صار في هجوم من قبل أحد الأطفال ما أحتاس

جهازي الموقر بعد ماشلت الي فوقه

سويت عملية التنظيف والصنفره وجيت بركب الأزارير …

ركبتهم بس علق معي كم زرار ( الأزايرير إلي على جنب _ الشفت _ واللي فوقه ثنين والنتر والأسهم )

قولي وش بقى سيكو << هو أكبر غلط إني شلت إلي على الجوانب لأن تحتهم زي الحديده يصعب ترجيعها

جلست أحوس يمين يسار أبيهن يركبون ركبوا بس بقا 5 أزارير رافضه ,,,

واحد من الأسهم انكسر أيضاً واحد من الأزاير بقا ثلاثه مو راضية تركب معي

جا الوالد يبي يزين رفضت خفت ينكسر ثالث معه بعدين …….

فأحسن شيء ينكسر في يدي ولا في يد غيري …

خليتهم لما أشوف أوديه لجرير يصلحونهن <<مقرره

ومن بكره الوالد رايح يصلح جهاز أختي عند الصالحية فعطيته الجهاز يوديه لجرير يغيرون الأزارير مره وحده بالطريق

وداه لهم وقالوا لازم نغير القطعه كلها من فوق بـ 300 ريال أنا ماعندي قلت أيه على طوول

بس رفضت بعدين لأنهم قالوا لازم نخلي الجهاز عندنا 15 يوم <<فاضيتلهم الإختبارات ويالله تحملت بعده عني

قلت مافي إلا شهر رمضان إن شا ءالله أحطه عندهم … وشلت فكره انه راح يتصلح ولا حاجه بهالأسبوع

بعد صلاة الظهر مادريت إلا الوالد الله يجزاه خير ويطول بعمره على طاعته

داخل ومعطيني الجهاز وقال صلحن الأزارير حقتك

استغربت كييف ..! قال إنه لما راح الصالحيه سألهم قالوا ماعندنا خبر بس رح للوكالة حقتهم

العليان بالملز فلما راح وراهم إياه والفشله إنهم سألوه من إلي سوا كذا

<<موصيته من قبل إنه إذا أحد سأله لا يقولهم القصه هع

قالهم : عبثوا فيه الصغار قال طيب كيف بنات ولا أولاد وشلون قال لا بنات بس انتوا شوفوا ودبروا تصليحه ,,

قاله أخبر إن البنات رحيمات على الأجهزه

وحطه عندهم وراح يصلي بعد الصلاة رجع لقاهم صلحوه وبدلوا الأزارير الخربانة .. ولما سألهم عن السعر قالوا لا مجاني

ماناخذ شيء

أتخيل إني حاطته عند جرير وصلحته بـ 300 ريال ولا ويقعد 15 يوم وطلب القطعه من برى

مع إنه معي ضمانه ماخلص ,, بس هالشيء هذا مايشمله ..يلعبون لعب على العالم ومستغل الناس..

هع الوالده الله يحفظها لما جا الجهاز قالت هالشيء درس لك مره ثانيه عاد تفكين وتركبين ..

<<مشكلة البطاله

الحمد لله مشت الأمور سليمه …

صورة الجهاز لما رجع لحالته الطبيعية ..

تجربه حلوه ومخوفه في نفس الوقت :P

بس في مشكله <<صايره الحروف تطير معي أكتب وأجي أناظر الي كتبته ألقى نص كلامي مقطع ><

وأخذنا منها درس ,, ولا تفككون الكيبوردات مره ثانيه << مشكلة الواثقين من أنفسهم بزياده يسون الشيء ولا يناظرون لعواقب هالأمر

……..~

أنا وبرامجي وما حققته ..~

السلام عليكم ورحمة الله وبركاته

..

تعلمت أن السعادة لا تتحقق في غياب المشاكل في حياتنا ..

ولكنها تتحقق في التغلب على هذه المشاكل ..

…

في يوم الاربعاء وبعد مارجعت من الإختبار طلعت جهازي من بيته <<ياعمري له أسبوع ماشاف النور مخبا جو الدولاب ..

جلست أحوس بالجهاز وفجأه قررت إني أحمل برنامج الفوتيشوب الاصدار العاشر ..

جلست أبحث عن روابط وأخيرا وجدتها ..

بديت بالتحميل وكان الوقت يمكن 10 بالليل .. من الفرحه ذاك اليوم مانمت الظهر جالسه على جهازي

وخليت الابتوب مفتوح يحمل وجلست خواتي عنده كل وحده تحركه شوي حتى مايطفى ونمت <<ماعندي

بعد ماصليت الفجر شفت الجهاز ولا هو مقفل ووقف تحميل عند 85 حاولت اكمل رفض ..

رجعت وحملته مره ثانيه لكن على برنامج التحميل FlashGet مشا لين وقصل 63 وقف من حاله

يمن يسار يابن الحلال امش عيا تهيء وأحذفه وأبدأ مره ثانيه أعيد تحميله لكن عادي من دون برنامج

وصل للستين وفرحت شوي إلا النت قفل :@ الوالد قام وشافه مفتوح ومايحسب أحد يشتغل عليه من الصبح وقفله

هنا لاتسألون عن حالتي شوي وانفجر رحت للوالده وقلتها تفتحه من جديد والحمد لله فتحته

وبديت أحمل من جديد .. الحمد لله حمل الرابط الأول وقتها حسيت بنشوة فرح وشي .. وكملت الروابط كلها

وحملت معي … يااي يوم خلصت كل الروابط جااني شعوور داخلي بالانجاز ..

مو أول مره أحمل داايم لكن ماتحسين أنك أنجزتي إلا لما يتخللها مصاعب وتقفيلات ..

24 ساعه وأنا أحمل فيه مره يضبط ومره لا

خلصت تحميله على العشاء .. وثبته وثبت معي مرره فرحت لأنه دايم أقرأ إنه مايتوافق برامج الأدوبي الإصدارات الأخيره مع بعض..

طفيت الجهاز لأنه بدا يخبص شوي رحمته له 24 ساعه يشتغل وكرف << عوض عن الاسابيع الي تاركته مرتاح

رجعت فتحته بعد ساعه وجتني فكره مدام إني محمله محمله ولا عندي شغل على الجهاز ليش ماأحمل برنامج الاستريتور

اأاصدار الأخير وأشوف هو يثبت ولا لا ..! إلي خوفني إني مثبته برنامج الانديرايزن ودايم يكون تعارض بين البرنامجين مايثبت واحد منهم لما يكون واحد موجود ..

سمينا بالله وبديت أحمل خلصت رابطين قبل أانام والثالث نمت وهو يحمل …

من التفكير بالتحميل قمزت بالليل 2 ونص تقريبا وأشوف التحميل هو خلص ولا لا هع .. لقيته خلص وخليت الرابع يحمل ونمت:)

ههه جهازي كنت مسطره الغطاء حقه نص وصاير على شاشه توقف .. فيوم صحيت وأبشوف رفعت الشاشه وشغلته وطلع نور جهازي ونوره قوي .. أختي جايتها حاله بالاختبارات تحط فراش بالأرض وتنام ماتنام على السرير

فصحت مرعوبه من النور هههه .. تحسب في شيء

بعد ماصليت الفجر كملت التحميل .. وهكذا …

على أذان المغرب خلصت تحميل البرناااااامج … لكن باقي مشكله عويييصه جدا

الكراك الفوتو قبل الكراك بس المشكله بحرقه وتفعيله ماعرفت كيف << أنا فاهمه غلط

الاستريتور مالقيت الكيجن حقه كلما حملت واحد مايفتح وأغلبها هو يثبت نفسه مع البرنامج

بديت أحوس وأعوص بالفوتو والحمد لله عرفت كيف أحرق وأفعل الكراك

( مشكلتي بعد مايقبل الكراك لازم تفعيل وهالتفعيل هو الي حاسني هع )

وتم طلب الكراك حق الاستريتور من المنتدى وجابته لي وحده الله يجزاها خير وركبته وفتح معي

ممم وقتها لما شفت إن جميع برامج أدوبي الإصدرات الأخيره تحملت معي وماواجهت صعوبه حسيييت بنشوة فرح

وانتصااار والكلام إلي يقولونه إن البرامج هذي ماتتوافق مع بعضها غلط × غلط

والتجربه خير برهان..

ممم يمكن لما أحد يقرا كلامي الي فوق يحس إنه هالشي أمر عادي..

بس لما يجرب ويعاني ويمر بمعوقات وصعوبات ويتخطاها ولا يركن للفشل من اول مره

هنا يحس بالفرحه والانجااز وإنه حقق أشياء مو شيء واحد

أقلها عرف كيف يتعامل تركيب البرامج هذي لانها مو مثل سابقتها من الإصدارات

والسلام مسك الختام

( اعذروني على الأخطاء الإملائية الهمزات << كاتبه على عجل وراي اختبار بكره

ثانيا اللغة العامية هالمره تعمدت أكتب فيها ث1